Setana hi biak tlak alo ni takzet em?

Kan ramah setana betu kan lo awm ve nual ta niin a lang. Khawvel mi ropui leh mi larte tih kan entawn a, malsawmna min pe thintuah ngaiin kan be thin niin a lang.
Inchhut chiang deuh teh ang. Mi lar (a bikin sap kan tih ang chite) leh ropui khawvel huap pawha mi hriat hlawh tam takte hi Setanic/Setanism an lo ni reng mai hlawm a. An lar chhuah hmain setana biain a hnen atangin malsawmna an dawng fo ni pawhin a lang. Mahse, han chhut chiang chiah ila, an hun kal zel leh an tawp dante han ngaihtuah a, han hriat chian meuh chuan eng malsawmna nge ni ta ngai le? tih mai tura nun hrehawm leh nun awhawm lote an lo ni leh si. Malsawmnain a thuam lai chauh kan thlir a, an tawp dan erawh kan chhut thleng lo fo thin.
Kan ramah ngei pawh malsawmtu ani tia setana betu a tawpa mangang leh si, nun hrehawm taka hmang a, hlau leh khura hring nun hmang mekte kei ngei pawhin sawi tur ka hre nual a sin!
Malsawmna hi setana hian ape thei lo tihna a ni hauh lo va, mahse, engati nge manganna khurah an tlukluh zel mai le? A chhan nia ka hriat ve chu, "Kei mah lo chu Pathian dang reng reng a awm lo." titu kan Pathian hian a phal lo a ni mai lo maw? Setana chuan a mite malsawmna tinreng vur a, a tawpa hremhmuna hruai luh hi a duh dan ber a nih a rinawm tehlul nen, a ngam loh Pathian, Isua Krista ngei chuan chung mite chu mangannain a um let thin a ni mai lo maw?
Setanan malsawmna chu a pe thei ngei ang le. Mahse, setana aia thil tithei leh ropui zawk hian malsawmna nasa zawk min pe thei a ni tih hriain amalsawmna dawng tura kan inbuatsaih hi a tul takzetin a lang.
Setana malsawmna leta malsawmna ropui min pe theitu van Pathian chu fakin awm mawlh rawh se. Amen.