Khawvel Sunday School Ni thuchah

Ziaktu: Upa H Lalduhsaka, Secretary, Bial Sunday School

Kawnpui Pastor Bial

Kumin 2012 Nov ni 4 ‘Khawvel Sunday School Ni’ kan lo thleng leh ta a. Pathian hnenah lawmthu awm rawh se. Sunday School pawimawhna te, a hlutna te, a tangkaina te hria a, hlawk taka hmang turin Kohhranho-te i inbuatsaih ang u.

Khawvel-in Sunday School a hmelhriatna chu kum 1700 lam daih tawh kha a ni a; mahse ngaihven zui hlawh lem lovin a zuih ral leh mai a. Kum 80 hnu, 1780 July thla ah Robert Raikes-a chuan England rama Gloucester khuah a rawn din thar leh a; mimal In (Mrs King-i In) chu man chawia luahin naupangte zirtirna bul a lo tan a, Zirtirtu pawh a thlawna thawk tur a hmuh mai loh avangin ama sum sengin a chhawr thin bawk. A tirah chuan naupang kal tur a hmuh loh avangin ei tur leh an thil duhzawng te hmangin a sawmkhawm thin a; an kalbo leh mai loh nan Kutkawlte hial a bun tir thin. Hun reilote hnu-ah naupangte pawh an tlangnelin nuam an ti tan ta hle a, Pathian thu ngawr ngawr bakah awmdan tha te, ziak leh chhiar te, Chhiarkawp te inzirtir nan hman thin a ni. Hemi avang hian Kohhran hruaitu thenkhat leh mi challang thenkhat ten an sawisel a; ‘Pathian niin School a hawng a, hei hi kan Dan kalh a ni’ tiin harsatna an siam sak a, inhnialna a chhuah phah ta hial a. British Parliament ah neuh sawiho a ni a. mahse Pathian in mal a sawm a, British lal ber chuan tha tiin nasa zawka kalpui turin a chah ta zawk a ni.

Khawvel pumah Sunday School chuan hmel hriat a hlawh ta zel a. Dr Bailey-a Philadelphia (USA) Kohhran Upa chuan ni bik ruat a, Sunday School Ni hman a rawt chhuak a, kum 1910 atanga hman tan a ni. Mizoram ah chuan Sap Missionary te lo chhuah hnu, kum 1944 atang khan hman tan a ni a, tichuan kumin hi a vawi 68 na a ni ta. Kumtin MSSU lamin thupui zir tur an thlang thin a. Kumin ah Puitling lamin Jonathan Edwards-a chanchin, naupang lamin Hellen Killer-i chanchin kan zir dawn a; zir nuam tak leh Kohhran hovin kan hlawkpui em em tur a ni a; an chanchin atang hian hmasawnna tur tam tak kan chhar thar ngei ka beisei.

Sunday School, khawvela School lian ber hi Pathian thu inzirtirna mai bakah nun kawng dik inkawhmuhna leh nungchang inzirtirna hmunpui a ni a. Ukil pakhat Fawell-a (New York) chuan ‘Tlangval sual 2700 ka Court-a an rawn hruai te chu Sunday School kal ngai lo vek an ni’ a ti a. Beginner atanga Senior thlenga Sunday School kal tluan zak te hi chu tluk palh chang awm mahse an bo hlen tak tak ngai lo. Chuvangin Sunday School hi ngai pawimawhin i hlut deuh deuh ang u.

Sunday School in hma a sawn zel theih nan Synod hnuaiah MSSU in theih tawpin hma a la mek zel a. Zirtirtu Seminat leh Training te nei turin Kohhran mal leh Bial huap-in MSSU Trainner eng tik lai pawhin koh leh sawm theih reng a ni a; kum tin a duh apiang tan VBS (Vaccation Bible School) nei turin ruahmanna a siam thin bawk., Sunday School Exam kumtin a buatsaih bakah chawimawina hrang hrang a siam bawk a; kan Bial-in tun thlenga Sunday School chawimawina a dawn tawh dan hetiang hi a ni.

Jubilee Award - 8

Diploma Award - 64

Pi Zaii Medal Special - 6

Pi Zaii Medal - 177

Zalawra Medal - 82

A vaiin - 337

Chhandamna leh chatuan nun neihna tura kawng min kawhhmuhtu mai bakah damlai hring nun kawng min chhiar thiam tirtu Sunday School min pek avangin Pathian hnenah lawmthu sawi mawlh mawlh ila. He ni hmangtu zawng zawng ten hlawkna nih ngei theih nan tan ila thar zel ang u.

(He thuchah hi Bial chhung Kohhran hrang hrang a KTP Chanchinbu tinah tih chhuah tura ruahman a ni a. Bial Sunday School Ziaktu thahnemngaihna a fakawmin, Peniel Editorial Board chuan lawmawm kan ti hle  ani.)