Ka hring nun. By.Chanchinmawia.

(Kan member 1 in huai taka a chanchin a ziah atangin he thu hi ka rilruah alo lang ve a, mahse, puanchhuah emaw sawi darh emaw ni lo hram se tiin ka ngen takzet che u a, zahthlak tihna pawh ka nei, mahse tu emaw talin malsawmna alo chan ve beiseiin ka ziak a ni)
A tawi zawngin ziah kan tum ang e.
Ka lo tleirawl chhuah ve lai chuan nu leh pate zarah mite awt em em lovin ka awm ve a, chu chuan ka nun sualah hruai lutin Pathian ngaihna reng ka nei ngai lo. Ka nuin natna khirh tak veiin min lo boralsan a, ka rilru a nain hrehawm ka ti hle thin a, tichuan ruihhlo zu, drugs nen ka phak ang tawkin khawvel ka chen ve a, Camping pawh vawi 30 vel lai ka lut tawh a, mahse, ka nunah ruihhlo a bet tlat tawh a, chhuahsan theih ka inring tawh ngai lo. Ruihhlo vangin kn nupa kan inthen hial a, jail ah pawh tum thum ngawt ka tang hman a ni.
Jaila ka awm laiin ka chhungten Camp i luh duh chual kan bail ang che tiin lehkha min rawn thawn a, ka inngaihtuah nasa hle a, ka piangthar zing tawh si, a zah pawh ka zak zo zai tawh a ni. Mahse sual vanga ka tawrhna chu na ka ti si a, aw le, ka lut ang tiin ka hrilh a, min bail a, ka Camp ve ta a, piangthar tak tak lova chhuah ai chuan inhlan lova chhuah ka duh zawk a, a chhan chu a hma anga tluk leh ka hlauh vang a ni. Camp ah chuan mak tak maiin ka piangthar ve ta, ka inhlan ve tawp mai ni berin ka hria. Hlim leh lawmna em em poh ka nei hran lo. Isua tan ka in hlan ve tawp mai a ni ber mai.
Ka Camp chhuak chu ka inngaihtuah nasa mai a, engtin nge Lalpa rawng ka bawl ve ang tih te, tu nge ka kawm tak ang ti tein, mahse Kohhran belh tlat chu ka tih tur niin ka hria a, kum 1 ah Kohhran Inkhawm zawng zawngah Inkhawm kim chang te, tum hnih inkhawm loh changte ka nei thin a, Kohhran leh KTP hruaitute leh memberte duhsaknain chanvo ka han nei ve ta a, ka phak tawkah ka inpe ve hlein ka inhre thin. Mahse chu chuan chapona min neih tir a, tha intiin midang hmuh hniamna ka lo nei ta a, ka nun chuan lal Davida ang khan ringtu nun chu rah pelh chang neiin ding leh veiah pen chang ka lo nei ta fo mai, Lalpan hling mi pe ta. Ka inthiam thei ngai reng reng lo.
Tichuan Branch KTP ah Comt. Member niin Asst. Secy. & Secretary te ni chho zelin, Leadera thlan ka lo ni ta, Secy. Ka nih lai hian ka pa a boral leh a, Leader ka nihin ka u a boral leh a, ka u fa rualbanlo enkawlin dawr pawh hawng thei lovin kan awm ta a, ka nu pension kal zel lah ka u boral atangin a tawp ta a, beidawnna chu ka ta liau liau alo ni ta niin ka hre thin.
Tichuan natnain min tlakbuak reng a, dam tih ni reng ka nei ngai ta lo. Hrisel lo tih hi pawm har ka inti a, mahse in pawm lo thei lovin ka awm ta si a. Ka hun kaltate ka ngaihtuah a, ka nu leh pa boraltate hian KTP Leader hial ka lo ni ve tate hi han hre ve se tiin ka tap ru thin. Kohhranah chanvo sang tak thuhril rawngbawlnate kan chang chho ve zel a, hmangaih kaltate rilruah an lo lang a, ka rum vawng vawng chang ava tam thin tak em!
KTP Leader a thlan ka nih tirh phei chuan nu leh pa thlazar hnuaia awm lo ka ni si a, zahawmna nei lo intiin Biak Inah zanahte tap chungin Lalpa ka ko ve thin a.
KTP inhruainain a tih chin kum 3 chu Leader niin, hruaitute leh memberte tawiawmnain ka hun ka lo hlenchhuak ve dawn ta reng mai a, Pathianah ka lawm em em thin a ni.
Mahse Leader kum 3 ka nih kum hian natnain min chim reng a, ka rawngbawlna pawhin a chhiat phahin, ka thlarau nun thleng pawhin a tuar hle a, enge maw chang phei chuan min hrethiam lo hial nite hian ka hre thin a, min demna leh sawiselnate kan hriat phei chuan ka na ngawih ngawih thin a, ka dinhmun leh natna hi darkar 1 chauh tal han tawng ve se la chuan min hrethiam ang mawle titein ka inngaihtuah hial thin.
Ka inngaihtuah sual a, ka rawngbawlpuite chungah ka thin a rim a, ka thinrim thu sawiin a tul a nih chuan ka bansan hmak mai ang tia ka rilru ka sen laiin, Lalpâ remruat fel tak ka chungah alo thleng ta. "Ka thlarau damna chu Isua hnenah a awm" tih hi chiang em emin ka thinlungah alo thleng nawlh mai. Lalpa chu fakin awm rawh se..!!
Tunah chuan nun dan ka lo thiam ta, tiin Lalpa chu ka fak ve thei ta, ka natnate ka ngaihtuah chhuah chang chuan kum li kum nga bak ka daih ka ring tawh lo. Hei hi a dik ngei pawh ka ring, mahse Pathian thu thu ni se, tuna ka tana pawimawh ta ber chu ka hun tlemte neih chhun hi Lalpa ropui nana theihtawp chhuaha hun hman hi a ni tawp tawh mai a ni.
Khawvelah chhungkua tih tur nei nei lovin, natnaten min chim reng thin mahse, Lalpa ka hnenah a awm a, Anin min ngaihtuah thin. Ka thla riltam tan chaw tha ber a ni a, Lal Isua ka duhber min hruaitu atan. Khawvel ropuina leh sannate nei lovin, vanduai niin min hre mahse, Isua ka neih avangin ka lungawi takzet a ni. Ka nunna hial lo tawpin he khawvel ka chhuahsan ni lo thleng mahse la, Isuan min awmpui, ka thla a muang takzet a ni.
Ka rawngbawl tawhna zawng zawngah khan chhuan tur ka nei lo. Lalpa chauh lo chu.
Lalpa rawngbawl hi tul lo se la chuan, hmangaih kaltate nen natna leh lungngaihna chim phak lohva Lalpa fak hun hi ka nghakhlel takzet tawh a ni. Ka chhungte nun dama la awm chhunte erawh ka ngaihtuah hle thin, mahse, min ngaihtuahtu ka Lalpa hian a thlahthlam lovang tih erawh ka chiang a ni.
Kei, misual, Amah phatsan a, ti lungngai thintu leh ti mualpho thintu ngei pawh hmangaihnaa min enkawl a, lainatnaa min tuam thintu ka Lalpa hi a hmaichhanah, "Isu, ka hmangaih che, ka ta i ni." ti a, a angchhunga thlamuangtaka ka chawlh ve hun tur ka ngaihtuah chang hian lawm avangin ka mittui a tla fo thin.

Awle, tam tak ziah tur ka la nei a, mahse, ka ziak kim zo lo va, ka ziak kim seng bawk hek lo a ni.
Kei mi tling lo, chakna reng nei lo leh a tana inpe zo lo, hmangaihna kuta min kuangkuah thintu ka Pathian chu kumkhuain chawimawiin awm se la, A hnenah chatuanin ropuina chu awm rawh se... Amen.