(KTP Day thuchah)
Ziaktu: C. Lalhmunmawia, Br. Leader
Zirtawpni khan KTP Day chu kan lo hmang liam leh ta a, ram chhung hmun hrang hrangah hemi ni pual hian Branch hrang hrang ten programme siamin an hmang hlawm a. Kumin KTP Day hi Mizoram a Kristian Thalai Pawl din champha vawi 59-na a ni a, kan Branch din champha vawi 36-na a ni bawk.
Thawnthu nise a ngaihnawm le mai tih awm reng, he pawl ropui tak Kristian Thalai Pawl a lo din dan hi tawitein han sawi hmasa dawn teh ang. November Ni 27, 1953 zanah khan Teachers' Training School Aizawl-ah Aizawl mi pawimawh deuh deuhte leh thingtlang Middle School Staff te'n Kohhran chhunga thalai awmte mumal nei deuh taka suihkhawm a, Krista rawng bawl tura an mawhphurhna hriat chiantir lehzual theihna turin pawl an din a, Provisional Committee an siam a, hei hi KTP lo din chhuahna bul chu a ni a.
A tirah chuan KTP a din duh lohna pawh hi a thawm a ring hle a, mahse Pathianin he rawngbawlna huang hi a ngaih pawimawh em avangin hun reilo te ah Synod Standing Committee-ah an thlen a, Synod Standing Committee tuna Synod Executive Committee kan tih tak(SEC) chuan 16.2.1954-ah rem an ti ta a ni. (SSC thurel no.3).
Mumal taka KTP din ni hi record hmuh a nih mai loh avangin Central KTP chuan tihchian tula hriain chhui thin a ni a, hruaitu hmasate an kawm atangin a ni chiang taka hriat theih an nei lo a, document pawimawh hmuh chhuah a ni lo bawk. Chuvang chuan February 23-26, 1989 chhunga General Conference, Khawzawl Venglaia neihah chuan February 22, 1954 chu KTP din tan hun, KTP Day atan pawm a lo ni ta a.
KTP hruaitu tura Chairman(Tuna Leader tia kan hman tak) hmasa ber chu Kristian Thalai Pawl din chhuaktu leh sulsutu ber Rev. O.W. Owen a ni a, Committee member hi Office Bearer te nen mi 12 an ni a, Mipa 6 leh Hmeichhia 6 an ni.
KTP thupui atan ‘Rawngbawl tura Chhandam’ (Saved to Serve) thlan a ni a. Bible chang innghahna atan II Timothea 2:3 hman a ni a. Hemi hnu lawkah hian remchang zawka ngaiin Ephesi 2:10 hman a ni ta zawk a ni.
KTP-in kum puan a neih tawh dan hetiang hi a ni:-
1987–88 - Mizorama Hnam dang ringlomite beihpui kum
1989 - Missionary Year
1990 - Zuk leh hmuam do kum
1991–93 - Mahni intodelh kum
1994 - Pathian thu zir uar kum
1995–98 - Kristian chhungkaw kum
2000-2001 - Kristian Nun - Thianghlimna kum
2002-2003 - Rinawmna
2004-2005 - Lalpa tih
2007-2008 - Lalpa tih
2008-2009 - Kristian Nun - nghehna
2009-2010 - Rorelna Dik
2010-2011 - Member Hlate Hnuhhnaih
2011-2012 - Thuawihna
2012-2013 - Isua nen.
KTP chuan hruai tum a nei a, buatsaih tum a nei a, tihpuitlin tum a nei a, puandarh tum a nei bawk a ni.
Kan thupui ‘Rawngbawl tura chhandam’ kan tih hian ‘rawngbawl ba-a chhandam’: Lei let tura Bawng lei tih ang hi a ni lo tih hriat a ngai khawp mai. Hetiang zawnga kan ngaihtuah chuan chhandamna hlutna a bo thei a, rulh leh tura chhandam te pawh kan ang thei mai dawn a ni. Heti zawng hian sawi ta ila. Miin doctor nih duh leh chakin MBBS a zir a, Engineer nih duh vangin B E a zir a. A han zir zawh chuan a hlawhtlinna phu tawk hna a hmu ta lo va. MBBS chuan eichawp dawr a nghak ta mai a, BE chuan Middle school-ah English te a zirtir ta mai a. MBBS leh BE nih man a awm lo hle mai. Engineer ni tura rim taka BE zirzo khan Engineer hna thawh tur a hmuh chuan chu chu hamthatna a ni a, Doctor ni tura MBBS zir zo tan pawh doctor hna thawh chu hamthatna, thil tuma hlawhtlinna a ni ngei mai. Pathian hmanrua ni tura chhandam kan nih ang taka hna thianghlim leh chatuan hna thawka rawng kan bawl hi chhandamnain a tum, chhandamna nen inzawm tlat a ni.
Chutianga chhandam chhan ti theia awmte chuan chu hamthatna chu dawng famkim turin heng kan thil tum te hi min hruaitu tha tak an ni ngei ang.
1. Isua Krista rinna leh Amah anna kawnga thalaite hruai: Rawngbawlnain a tum ber chu Krista ringtu ni tura midangte sawm leh Krista nundan entawna nung tura hruai a ni. Kristian Thalai chuan Krista ringa Amah ang tura thalaite zirtirtu leh kawng kawh hmuh tu ni mai lova hruaitu nih a tum a ni. Hruaitu chu a hruaia te aiin a kal hmasa tur a ni a, mi hnungah a kal tur a nilo. Amaha thil awm leh lang chhuak atang chuan a hruaite’n an kawng zawh tura phurna te, hriatchianna te, pengbo lo tura fimkhurna te an lo chang tur a ni a, chu nun chu an entir thei tur a ni. Chuvangin Kristian Thalai chuan a hruaia te rin tur Krista chu a entir anga, a rintlak zia te a nunin a puang chhuak ang a, Khawi hmunah pawh Krista anga nun awmzia a lantir reng a ngai a ni.
2. Kohhran kutke ni tura thalaite buatsaih: Kohhran chu Krista taksa a ni a, Krista chu kohhranho luber a ni. Krista ringa Amah anna kawng zawhtute chu kohhran tan kutke tangkai an ni tur a ni. KTP hian thalaite hi kohhran kutke ni turin a buatsaih zel em tih hi a in en reng a ngai bawk ang. Kohhran zia lo taka kan member te kan kaihhruai palh chuan kan mawh a sang hle dawn a ni. Kan hlimna te, kan tunlaina te, kan zei velna zawng zawng te hi Kohhran ze pui: khunkhanna te, thlaraua tuina leh mumalna te hian a kaihruai reng fo tur a ni a. KTP Committee Member phei chuan Kohhran zia leh Kohhran inrelbawl dan a zir ang a, chu kawng chu a kal hlat san tur a nilo, member te a nun a entirtu tur a nih avangin.
3. Kohhran hnathawh tihpuitlin: Kohhran hmalakna hlen chhuah tihna pawh a ni awm e. Kohhran hian Krista taksa tihfamkimna tur kawng hrang hrang a relin hmasawnna turin hma a la fat fat reng a. A relte hi a thapui, thalaite tel lo chuan hlenchhuah theih loh tam tak a awm a ni. A thalai pawlte hmachhuanin kohhran chuan hmachhawp a siam thin a. Chumi hlen chhuah chu Rawngbawl tura chhandam Thalaite hian phur takin, hamthatna ropui tak ani tih hria a a hlenchhuah thin a pawimawh a. Chu chuan taksa peng hrang hrang inpumkhatzia pawh a ti lang thin a ni. Taksa peng hrang hrangte hian Pumpui (stomach) hi awm mai mai a, pengtin te hian chawma phe suau suau niin an inngai a, an thik ta a. Thawk tawh bik lova nawrh an rel a. An han nawrh meuh chuan pumpui chauhin a tuar ta awzawng lova, pengtin mai chu an zawi a, an khur ta hlawk hlawk mai a ni awm e. Tute emaw ropui nana thawka, kan zarah tuteemaw an nuamsa mai emaw tih awl tak ani. Mahse, midang tan ni lovin kan zaa chakna Krista taksa ropuina tura mahni hma zawnah theuh thahnem ngai taka kan thawh sang sang hian Krista taksa chu a lo ropui thin a lo ni.
4. Krista chanchin tha puan darh: He hna hi tumah papek bik theih a ni lo. Kal chhuakte kuta dah mai tur a ni lova, tawng thiamte leh thusawi thiamte tih tura dah mai tur lah a ni hek lo. Kal chhuak kher lovin a thawh theih a, tawng thiam lovin nun leh thiltihin a puan chhuah theih a, sawi thiam lo pawh chanchin tha nena in mawiin a nung thiam thei tho bawk. KTP ten chanchin tha puan darh kan tum avangin kal chhuaka Missionary hna thawh vek tum kher tur tihna a ni lova, Paula’n, ‘Engpawhnise, in awm dan leh Krista chanchin tha chu in mawi phawt rawh se’ (Phil 1:27) a tih ang khan kan tih leh kan sawi, kan chet zia zawng zawng hian Krista chanchin tha a hril thei a. KTP hnatlang leh thiltih khawmna reng rengah pawh kan sawi duh zawng leh kan fiamthu duhzawngte pawh khawvel mite ang a ni tur a nilo. Khawi hmunah pawh awm ila Krista hmel lantirtu leh a chanchin puangtu kan ni tih hi a lang tur a ni mai lova, fiah takin tlan pah pawha miin an chhiar theih turin kan lantir tur a ni.
Sawi tur tam tak a awm thei ang. Kan thupui leh kan thil tum hre mang lo hian, tum nei mumal manglovin a KTP ve tlut theih tho avangin kan thupui leh kan thil tum te hi ngaihtuah nawn fo a pawimawh hle a ni.
KTP Member-te kan thlen chin atang hian hma i sawn zel ang u. Lalpa’n malsawm rawh se.
